Robin, Jean

Euskal idazle lapurtarra (Donibane-Lohizune, 1738-1821). Ez zuen lan originalik idatzi; bere sinadura duten obrak besteek idatzitakoen kopia baino ez dira. Miguel Angel Marín elizgizonak frantsesez idatzitako Birjinia edo donceil christaba lanean, Lafitteren ustez, Robin kopiatzaile hutsa izan zen eta ez da ezagutzen euskarara itzuli zuenaren izena. Itzulpen horrek duen berezitasunik nabarmenena Larramendiren ukitua duten neologismo-kopuru handia da; horrek, Ipar eta Hego Euskal Herriaren artean harremana bazegoela adierazten du.